2001-03-14

అప్పుడు - ఇప్పుడు

14th March, 01
వాడి కుంది నాకెందుకు లేదు అనికాదు అడగడం.. అది వేరే రకం..
అప్పుడు నేను ఏదో స్థితి ని సాధించానుకదా, ఇప్పుడు నాకెందుకు లేదు ? అబ్బ ఆ రోజులు ఎంత బాగుండేవి ప్రశాంతంగా, ఇప్పుడేంది ఇంత ఆందోళన, గందరగోళం? ఆ సుఖాలు నాకెందుకు లేవు ఇప్పుడు ? ఆ మానసికి స్థితి మళ్ళీ రాదే? కోరికల సౌధాలు హఠాత్తుగా మాయమైనాయేం (మొలిచినాయేం)
ఇదే ఏడుపు జీవితమంతా మనిషికి. ఎందుకు continuity ఉండాలి అని deep గా ప్రశ్నించుకోవడం చాలా కష్టం. కోరికలు తీరనందుకు బాధ ఒక రకం. కానీ past లో కోపాన్నో ఇంకోకటి దేన్నో జయించాను అనుకున్నాడు లేదా తెలివిగలవాడినని prove అయింది అనుకున్నాడు. అవే స్థితులు continue అవాలి - వాటి కోసమే వెంపర్లాట. ఇప్పుడు ఈ క్షణంలో ఏం జరుగుతోందో చూడలేడు.
ఇప్పుడు ఈ క్షణం లో దాన్ని గురించి ఎంత ఆలోచించినా, జ్ఞాపకం తెచ్చుకుందామనుకున్నా ఏదో వెలితి. ఆ స్థితిని కంపేర్ చేసుకుని. పేరు పెట్టలేని ఆస్థితి లో ఉన్నప్పుడు ఎంత చురుకుదనం మైండ్ కి.. ఏ విషయం ఆలోచించినా ఎంత స్పష్టత..ఉండాల్సిన విషయాలమీద ఎంత ఆసక్తి.. సరియైన సమయం లో సరియైన ప్రమాణంలో(?!) ఇంక ఇదేనా కొడుమ.. జీవితమంతా దాన్ని గుర్తుకు తెచ్చుకుని వేళ్ళాడడమేనా..క్షణం నిత్య నూతనం గా భాసిస్తుందా మళ్ళీ? (ఏవి తల్లీ నిరుడు కురిసిన..) ఆ స్థితి లో ఉన్నప్పుడు మంచితనం, చెడ్డతనం, భయం, సెక్సు కోరికలూ అన్నీ విడి విడి ఆలోచనలేనని ఒక క్షణం మెరుపులా మెరిసింది ఒక భావన. భౌతిక ప్రపంచం అంతా ఎలా images రూపం లో హర్మ్యాలుగా కట్టబడిందో అనుక్షణమూ అర్ధమయ్యేది.
ఆ స్థితి లేనప్పుడు ఈమాటలు వందలసార్లు చదివినా, వేలసార్లు 'అర్ధం' చేసుకోవడానికి ప్రయత్నించినా - అవి కేవలం మాటలుగానే మిగిలిపోయేవి.
మళ్ళీ ఆస్థితి రావాలంటే, అది కేవలం ఒక ఆలోచనగా, జ్ఞాపకంగా మిగిలిపోకుండా ఉండాలంటే ఏం చెయ్యాలి అని అడుగుతున్నాడు వాడు. ఏమీ చెయ్యొద్దు అని జవాబు అని ఆయన దగ్గిర్నించి. అసలు నీకా స్థితి మళ్ళీ ఎందుక్కావాలి ఏంటి నీ మైండ్ లో జరుగుతున్నది ఇప్పుడు.. ఇప్పటి స్థితి అది చూస్కోమంటున్నాడు మిగిలిందంతా వదిలేసి.

2001-03-06

ఎంతకీ రాని అనూరుడు

March 6, 01
నిరంతర చైతన్యపు ఏ పూర్వపు భాగముల కలయిక ఇప్పటి చైతన్యపు
రూపంగా రూపొందిందో తెలుసుకోవాలన్న ఆకాంక్ష..
అంటే పూర్వజన్మ (?) లో ఎవరో తెలుసుకోవాలట!
అనూరుడు కనపడ్డాడు అనడానికి బదులుగా..

2001-03-03

సంఘటన

3/3/01
చాలాసార్లు అనుభవమే. ముఖ్యంగా ఏదైనా చెడ్డ సంఘటనో, దేన్నైనా కోల్పోవడమో, తప్పుకు ఫలితం అనుభవించినప్పుడొ - ఎంతగానో పరుగులు తీస్తుంది మనసు ఆ సంఘటన జరగడానికి ముందు ఉన్న కాలానికి. ప్రస్తుతం ఉన్న స్థితి లో ఏదైనా ఉపద్రవం జరిగితే ఎలా మనసు వెనక్కి పరుగులు తీస్తుందా అని ఆలోచిస్తున్నాడు అతడు. అంటే future లో చెడ్డ సంఘటన ని ఊహించుకొని మనసు ఏ విధంగా react అవుతుందో అలోచిస్తున్నాడన్న మాట. ఇదొక defensive mechanism లాగా ఉంటుంది. చెడ్డ నీ ఉపద్రవాల్నీ ఊహించుకొని అది జరక్క పోతే తృప్తి పడడం.. ముందే చెడ్డని ఊహించుకున్నందువల్లే అదిజరగలేదనుకోవడం...
ఎప్పుడూ పరుగులు తీసే దీన్ని గమనించుకుంటో రాసుకుంటే అదొక అనుభవం.. ఈ గమనింపు లో నిజాయితీ ఎంతముఖ్యమో అర్ధం అవుతోంది అతడికి కొంచెం కొంచెం.. రాయడం లో వున్న నిజాయితీ కొంచెం గా మిగతా విషయాలకి పాకడం తెలుస్తోంది.
ఒక సమస్య ని పరిష్కరించలేక పోయి దాన్ని పూర్తిగా ఒప్పుకున్నప్పుడో, తన మాటల వెనుక ఉన్న అసలైన motives ని సూటిగా చూడగలిగినప్పుడో తెలుస్తోంది - విషయాన్ని వున్నదున్నట్లుగా చూడడం లో ఉన్న సౌందర్యం.
***
నిన్నంతా ఇంటికి వచ్చిన ఆఫీసు మనిషి potent, aggressive (and diluted) talk తో గదిచిపోయింది.
ఒక్కక్కప్పుడు ఈ సంఘటనలన్నీ వివరంగా రాయాలని ఉంటుంది.. చూసే దృష్టి లో తేడాల వల్ల మామూలు విషయాలు ఎంతెంత తేడా గా కన్పిస్తాయో office లోని వివిధ రకాల మనుషులకి..
ఆఫీసు లో వివిధ పాత్రధారులు ఏయే సమయాల్లో ఎలా ప్రవర్తించారో, వాళ్ళ మానసిక స్థితుల్నీ పరిస్థితుల్నీ వీలైనంతవరకూ పూర్తిగా రాయాలంటే ఎంత ఓపిక, జ్ఞాపకం, focus కావాలో - కాగితంమీద పెట్టడానికి భయాలు, సంకోచాలూ ఎదురవుతాయి.. ఇంకోళ్ళ మానసిక స్థితి ని మనకళ్ళతో చూడడం లోనే అభాసం ఏదో ఉన్నట్టుగా వుంది..
అందరికీ ఒకేలా కనబడుతోందని ఎక్కువ మంది నమ్మే ఈ ప్రపంచం లో చాలా ఎక్కువ భాగం అనేక రకాలుగా ప్రతిష్టితమై ఉంది అనేక రకాల మనుషుల్లో .. వేల ప్రపంచాలు ఒకే సమయం లో నడుస్తున్నై.. కనీసం అలోచనల్లో..
క్వాంటం కఠినప్రశ్నలకి జవాబు గా చెప్పే అనేక ప్రపంచ సిద్ద్దాంతం..